COVID-19 ის წინააღმდეგ უკვე ბრენდები ამოქმედდნენ. ეს ბრენდები იყენებენ ეგრეთ წოდებულ CAUSE RELTED MRKETING-ს, რომელიც ქართულად როგორც მიზეზ-შედეგობრივი მარკეტინგი, ან შედეგზე ორიენტირებული მარკეტინგი, უნდა ითარგმნოს.

შესაძლოა გამოვიყენოთ ამგვარი ტერმინიც – სოციალურ შედეგზე ორიენტირებული მარკეტინგი, მაგრამ მაშინ ამ თემას სოციალური მარკეტინგი მთლიანად დაფარავს, ამიტომაც მხოლოდ მიზეზ – შედეგობრივ მარკეტინგს დავარქმევთ იმას რასაც Cause Related Marketing -ის ამერიკული მოდელი გვთავაზობს.

მიზეზ შედეგობრივი მარკეტინგი მომხმარებელს რომელიმე სოციალურ ბრძოლაში ჩაბმას სთავაზობს.

კონცეფციის ისტორია

Cause Related Marketing-ის კონცეფცია პირველად შექმნა და გამოიყენა ამერიკელების კუმირმა, დიდმა მსახიობმა პოლ ნიუმანმა (Paul Newman). ამ დიდ მსახიობს და გამოჩენილ ადამიანს უყვარდა ხალხი, იგი გრძნობდა, რაღაც დამატებით ქველი საქმენი უნდა ჩაედინა ადამიანებისათვის. შესაბამისად მან მოიგონა მიზეზ-შედეგობრივი მარკეტინგი.

მაინც რა არის მიზეზ-შედეგობრივი მარკეტინგი? მისი განსაზღვრა ასეთია: მომგებიანი ორგანიზაციის საჯარო ასოცირება არამომგებიან ორგანიზაციასთან, კომპანიის პროდუქტის პრომოციისათვის, რათა მოხდეს თანხების მოზიდვა ქველმოქმედების მიზნით. 

ეს კონცეფცია სწრაფად გავრცელდა, რადგანაც ჰოლივუდის ვარსკვლავმა, მრბოლელმა, კარგმა კაცმა, პოლ ნიუმანმა საკუთარი სალათა, სწორედ ქველმოქმედებისათვის შექმნა. ამ საწებელს მთელი მსოფლიო შეექცეოდა, რადგანაც იგი თავად ნიუმანის შექმნილი იყო. შესაბამისად გროვდებოდა ფული კეთილშობილური მიზნებისათვის, გაჭირვებულთა და მოწყვლადთა დასახმარებლად. ამ საწებლის 23 ვარიანტი იყიდება დღესაც. ფული კი ქველმოქმედებაში მიდის.

მიზეზ-შედეგობრივი მარკეტინგის ახალი ბრენდები

ონლაინ მაღაზიებში გამოჩნდა Casetify’s UV Sanitizer, რომელიც განსაკუთრებით ეფექტურად კლავს ბაქტერიებს თქვენს მობილურ ტელეფონზე. ამავე დროს ამ ბრენდის შეძენა გამოიწვევს, ნავაჭრი თანხის 100 % -ის ჩარიცხვას GlobalGiving’s Coronavirus Relief Fund -ში, რომელიც კორონავირუსის წინააღმდეგ შეიქმნა. შესაბამისად ამერიკელებს აქვთ შესანიშნავი საშუალება მოკლან ბაქტერიები საკუთარ მობილურ ტელეფონზე და ამავე დროს დაეხმარონ სოციალურად დაუცველ ამერიკელებს, რომლებიც უსამსახუროდ დარჩნენ სწორედ COVID-19 შემოტევის შემდეგ.

Casetify – ამგვარად გამოიყურება. თქვენ ტელეფონს დებთ სპეციალურ კონტეინერში, სადაც

ყოველი ბაქტერია იმავე წამს კვდება – შესაბამისად მობილური ტელეფონის ამოღებისა და ხმარების შემდეგ, ჩვენ დარწმუნებული ვხდებით იმაში, რომ ჩვენი ტელეფონი, რომელიც უკვე მრავალი ადამიანისათვის „სხეულის ნაწილია“, უხიფათოა და არ დაგვავირუსებს. შესანიშნავი ინოვაციაა ეს პროდუქტი მრავალი მარკეტერის აზრით და ამავე დროს იგი სრულიად ექვემდებარება მიზეზ-შედეგობრივ მარკეტინგს.

Everlane – არის 2010 წელს, სან-ფრანცისკოში დაარსებული საკმაოდ ცნობილი კომპანია, რომელიც მისდევს ეკოლოგიურ (Eco-Friendly) იმიჯს. მისი ახალი პროდუქტი 100% Human, მეტად სოციალური და მიზეზ-შედეგობრივია. ამ მაიკის ყიდვით თქვენ ფაქტიურად გადახდილი თანხის 100% რიცხავთ კორონავირუსით დაზარალებული ამერიკელების კვების ფონდში – Feeding America’s COVID-19 Response Fund, რომელიც მთელი ქვეყნის ტერიტორიაზე კვებავს ადამიანებს.

Everlane – მუდამ გამოირჩეოდა საინტერესო კოლექციებით. ამ ბოლო პერიოდში მას აკრიტიკებდნენ კიდევაც ნაკლებად მოქნილი Cause Related Marketing -ის გამო.

მაგრამ კომპანიამ არსებული პრობლემა წარმატებით გადაჭრა და საერთო ამერიკული სულით აღვსილი, გლობალური პანდემიის ბრძოლაში ჩაება.

ადრე Everlane – ს ფასების გულისთვისაც აქიაქებდნენ, „ზედმეტად ძვირიაო“ პასუხს სთხოვდნენ. მაგრამ როგორც ვხედავთ ამ ბრენდმა სწორი გადაწყვეტილებები მიიღო ნაციონალური უბედურების ჟამს. ცნობილია ის რომ მისი ერთ-ერთი ფანი გახლავთ ინგლისელი ვინძორების რძალი- Meghan Markle მეგან მარკელი, რომელიც პირველად პრინც ჰარისთან ერთად სწორედ Everlane-ს ჩანთით გამოჩენილა ვესტმინსტერის სასახლეში.

Kendra Scott

კენდრა სკოტი -კორონავირუსთან მებრძოლი ბრენდია, რომლის გაყიდული საიუველირო ნაწარმი 100 % -ით დაეხმარება ამერიკის მოსახლეობას უფასო სადილებით. ბრენდი ძალიან „ემოციური, მიმზიდველი და ეროტიულია“. იგი ემოციურ კავშირშია მომხმარებლებთან.

PopSockets

ტელეფონების აქსესუარების კომპანიამ შეიმუშავა ორი ბრენდული მასკოტი, რომელიც დაეხმარება ცნობილ მებრძოლ ორგანიზაციებს „ექიმები საზღვრებს გარეშე“ Doctors without Borders და ფონდს „გამოკვებე ამერიკა“ Feeding America, მოიზიდონ თანხები თავიანთი კეთილშობილური მიზნებისათვის.

განსაკუთრებით აქსესუარი -„გამოკვებე ამერიკა“ მიმზიდველად და ემოციურად გამოიყურება, იგი ღირს 15 დოლარი. მართლაც ამერიკაში ერთი კაცის სადილის ღირებულება, სწორედ 15 დოლარის ტოლფასია. აქსესუარი სიმპათიურია და რაც მთავარია კორონავირუსთან საბრძოლველად არის გამიზნული.

Theragun

ეგრეთ წოდებული „მასაჟის თოფი“, კომპანიის ერთ-ერთი ახალი ბრენდია. მარკეტინგის მოდელი, რომელიც გამოიყენება, ჰპირდება მომხმარებელს, რომ თვითოეული გაყიდული „მასაჟის თოფი“ – უფასო სადილს აჭმევს კორონა ვირუსისაგან დაზარალებულ ამერიკელს. მთლიანობაში დაგეგმილია

250 000 უფასო სადილის გამართვა ამ ბრენდით ამერიკის სხვადასხვა შტატებში, სადაც ადამიანები განსაკუთრებით დაზარალდნენ კორონას პანდემიისაგან.

ამგვარად ჩვენი სამყაროს ერთ-ერთი ყველაზე დიდი გამოწვევის COVID -19 ის წინააღმდეგ ამერიკული ბრენდები მიზეზ – შედეგობრივი მარკეტინგით მოსახლეობის დარაზმვას ეფექტურად ახდენენ. თავად ამგვარი მარკეტინგი, კომპანიისა და ბრენდის იმიჯის შესაქმნელად, ეფექტური იარაღია თუ კანონიერად და სამართლიანად გამოვიყენეთ იგი.

ავტორები: პროფესორი კახაბერ ჯაყელი, ივანე კერესელი